पुणे (खराडी) : आयटी हब असलेल्या खराडी परिसरातील एका नामांकित इंजिनिअरिंग कंपनीत तब्बल १ कोटी ४६ लाख ६६ हजार २२ रुपयांचा आर्थिक अपहार उघडकीस आला आहे.
कंपनीच्याच बिलिंग मॅनेजरने बाहेरील कंत्राटदारांशी संगनमत करून कामगारांच्या बनावट बिलांच्या माध्यमातून हा घोटाळा केल्याचे तपासात निष्पन्न झाले आहे. याप्रकरणी चंदननगर पोलिसांनी (खराडी) चार जणांविरुद्ध गुन्हा दाखल केला असून न्यायालयाने आरोपींना तीन दिवसांची पोलीस कोठडी सुनावली आहे.
कसा झाला घोटाळा?
हा प्रकार सन २०१८ ते २३ मे २०२६ या कालावधीत खराडी येथील ग्रँड रोडवरील फिनिक्स शाळेसमोरील ‘के-५७’ आणि ‘के-६५ गेरा कॉमर्स झोन’ या दोन साईट्सवर घडला.
कंपनीचे अधिकारी अनुप कुमार भास्करण लंबियार (वय ५३, रा. वाकड) यांनी दिलेल्या फिर्यादीनुसार, मुख्य आरोपी इस्माईल शेख (वय ३६, रा. कोंढवा) हा ‘मिलेनियम इंजिनिअरिंग अँड कॉन्ट्रॅक्टर प्रा. लि.’ कंपनीत बिलिंग मॅनेजर म्हणून काम करत होता. त्याने आपल्या पदाचा गैरवापर करून पश्चिम बंगाल, झारखंड आणि बिहारमधील इतर आरोपींशी हातमिळवणी केली.
आरोपींची नावे:
१. इस्माईल शेख (मुख्य आरोपी, बिलिंग मॅनेजर)
२. रिझवान शेख (रा. मालदा, पश्चिम बंगाल)
३. खुशबश अन्सारी (रा. झारखंड)
४. संजीत लाला पंडित (रा. वैशाली, बिहार)
पोलिसांनी दिलेल्या माहितीनुसार, आरोपींनी प्रत्यक्षात कामगार नसतानाही त्यांच्या नावाने बोगस बिले तयार केली आणि बिलाची रक्कम स्वतःच्या खात्यावर वळती केली. प्राथमिक तपासात १.४६ कोटींचा अपहार झाल्याचे स्पष्ट झाले असून आकडा आणखी वाढण्याची शक्यता आहे. या प्रकरणाचा पुढील तपास खराडी पोलीस करत आहेत.
