वाहतूक शाखा व आरटीओची संयुक्त विशेष मोहीम यशस्वी; १८१ वाहनांची तपासणी, नियमभंग करणाऱ्यांकडून ₹३.७६ लाखांचा दंड वसूल
पिंपरी | प्रतिनिधी पिंपरी-चिंचवड शहरात शालेय विद्यार्थ्यांच्या सुरक्षिततेला सर्वोच्च प्राधान्य देत वाहतूक शाखा आणि प्रादेशिक परिवहन कार्यालय (आरटीओ) यांच्या संयुक्त विद्यमाने धोकादायक पद्धतीने विद्यार्थ्यांची वाहतूक करणाऱ्या वाहनांविरोधात विशेष तपासणी मोहीम राबविण्यात आली. या मोहिमेत अवघ्या चार दिवसांत १८१ शालेय वाहतूक करणाऱ्या वाहनांची तपासणी करण्यात आली असून, नियमांचे उल्लंघन करणाऱ्या ६९ वाहनांवर कारवाई करून ₹३ लाख ७६ हजार १०० रुपयांचा दंड वसूल करण्यात आला.
शालेय विद्यार्थ्यांची वाहतूक करताना क्षमतेपेक्षा जास्त विद्यार्थी बसविणे, आवश्यक कागदपत्रांचा अभाव, सुरक्षा नियमांचे उल्लंघन तसेच मोटार वाहन कायद्याचे पालन न करणे अशा तक्रारी वाहतूक शाखेकडे सातत्याने प्राप्त होत होत्या. या पार्श्वभूमीवर वाहतूक शाखेने आरटीओ पिंपरी-चिंचवड यांच्याशी समन्वय साधून संयुक्त विशेष तपासणी मोहीम हाती घेतली.
दि. २९ जून, ३० जून, २ जुलै आणि २० जुलै २०२६ रोजी पिंपरी, वाकड, सांगवी, म्हाळुंगे, चिखली, तळवडे आणि हिंजवडी वाहतूक विभागाच्या हद्दीत ही कारवाई करण्यात आली. तपासणीदरम्यान शालेय बस, व्हॅन, रिक्षा आणि इतर विद्यार्थी वाहतूक करणाऱ्या वाहनांची सखोल पडताळणी करण्यात आली. नियमांचे उल्लंघन करणाऱ्या वाहनांवर मोटार वाहन कायद्यानुसार दंडात्मक कारवाई करण्यात आली.
वाहतूक शाखेने दिलेल्या माहितीनुसार, या मोहिमेत एकूण १८१ वाहनांची तपासणी, ६९ वाहनांवर कारवाई आणि ₹३,७६,१०० इतका दंड वसूल करण्यात आला. विद्यार्थ्यांच्या सुरक्षिततेशी कोणतीही तडजोड सहन केली जाणार नसून, भविष्यातही अशा संयुक्त विशेष मोहिमा नियमितपणे राबविण्यात येणार असल्याचे वाहतूक शाखेने स्पष्ट केले आहे.
ही कारवाई पोलीस आयुक्त विनयकुमार चौबे, सहपोलीस आयुक्त शशिकांत महावरकर, अपर पोलीस आयुक्त सारंग आवाड यांच्या मार्गदर्शनाखाली वाहतूक शाखेचे पोलीस उपआयुक्त विक्रांत देशमुख तसेच वाहतूक विभागाचे अधिकारी, कर्मचारी आणि आरटीओच्या संयुक्त पथकाने केली.
तपासणी केलेली वाहने : १८१
कारवाई केलेली वाहने : ६९
वसूल दंड : ₹३,७६,१००
कारवाईची ठिकाणे : पिंपरी, वाकड, सांगवी, म्हाळुंगे, चिखली, तळवडे आणि हिंजवडी
> “विद्यार्थ्यांच्या सुरक्षिततेला प्राधान्य देत नियमभंग करणाऱ्या शालेय वाहतूक वाहनांवर यापुढेही कठोर कारवाई सुरूच राहणार आहे,” असा इशारा वाहतूक शाखेने दिला आहे.
