पिंपरी-चिंचवड : वायसीएम रुग्णालयातील मध्यवर्ती निर्जंतुकीकरण केंद्र अर्थात CSSD अद्ययावत व नूतनीकरणाच्या कामासाठी तब्बल १७ कोटी ५८ लाख रुपयांचा खर्च करण्यात आला आहे. मात्र, हे काम पूर्ण झाल्यानंतर आता त्याच्या देखभाल-दुरुस्तीसाठी दरवर्षी सुमारे ८६ लाख रुपये खर्च करण्यास स्थायी समितीने मान्यता दिल्याने या निर्णयावर प्रश्नचिन्ह उपस्थित होत आहे.
उपलब्ध कागदपत्रानुसार, CSSD चे Turn Key पद्धतीने काम मे. निर्मिती इंजिनिअरिंग कॉर्पोरेशन, पिंपरी यांच्याकडून करण्यात आले. या कामाचा कालावधी तीन वर्षांचा होता आणि तो १४ मे २०२६ रोजी पूर्ण झाल्याचे नमूद आहे.
यानंतर पुढील पाच वर्षांसाठी देखभाल-दुरुस्ती अर्थात CMC करण्याची तरतूद करण्यात आली आहे. वैद्यकीय उपकरणांच्या किमतीच्या ५% टक्के दराने ही देखभाल करण्याचा प्रस्ताव असून, कागदपत्रानुसार वार्षिक खर्च ८६ लाख ४ हजार ७६७ रुपये इतका येतो.
म्हणजेच केवळ पुढील पाच वर्षांचा विचार केला तरी देखभालीसाठी तब्बल ४ कोटी ३० लाख रुपयांपेक्षा अधिक खर्च होणार आहे.
महत्त्वाचा प्रश्न असा की, एवढ्या मोठ्या खर्चातून CSSD चे अद्ययावतीकरण आणि नूतनीकरण नुकतेच पूर्ण झाले असताना त्यानंतर लगेच एवढा मोठा वार्षिक देखभाल खर्च का आवश्यक आहे?
स्थायी समितीने या खर्चाला मान्यता देण्यापूर्वी उपकरणांची प्रत्यक्ष किंमत, देखभालीची गरज, CMC दर निश्चित करण्याची पद्धत आणि पर्यायी देखभाल व्यवस्था यांचा सखोल विचार केला आहे का? तसेच, या देखभाल करारामुळे महापालिकेवर पुढील अनेक वर्षे किती आर्थिक भार पडणार आहे, याची माहिती नागरिकांसमोर ठेवणे गरजेचे आहे.
१७.५८ कोटींच्या कामानंतर पुन्हा कोट्यवधींचा देखभाल खर्च — हा जनतेच्या पैशांचा योग्य वापर आहे का? असा सवाल आता उपस्थित होत आहे.
स्थायी समितीने या निर्णयाचा फेरविचार करावा, संपूर्ण खर्चाचे विवरण सार्वजनिक करावे आणि या देखभाल करारामागील आर्थिक गणित नागरिकांसमोर स्पष्ट करावे, अशी मागणी होत आहे.
