चिखली | पिंपरी-चिंचवड शहरातील चिखली येथील घरकुल परिसरात डेंग्यूच्या रुग्णांची संख्या वाढत असल्याने नागरिकांमध्ये चिंतेचे वातावरण निर्माण झाले आहे. परिसरात जवळपास सहा डेंग्यूचे रुग्ण आढळल्याची माहिती समोर आली आहे.
डेंग्यूचा प्रादुर्भाव रोखण्यासाठी महापालिकेच्या आरोग्य विभागाकडून नियमितपणे औषध फवारणी, डास प्रतिबंधक उपाययोजना आणि धूर फवारणी करणे अपेक्षित आहे. मात्र, प्रत्यक्षात घरकुल परिसरात या उपाययोजना कितपत होत आहेत, असा सवाल आता नागरिकांकडून उपस्थित केला जात आहे.
एकीकडे डेंग्यूचे रुग्ण आढळत असताना दुसरीकडे धूर फवारणी करणाऱ्या गाड्या परिसरातून गायब झाल्या आहेत का? त्या बंद आहेत का? की कागदावरच फवारणी सुरू आहे? असे प्रश्न नागरिक विचारत आहेत.
महापालिकेच्या फ क्षेत्रीय कार्यालयाच्या आरोग्य विभागाकडून घरकुल परिसरात डेंग्यू प्रतिबंधासाठी नेमक्या कोणत्या उपाययोजना करण्यात आल्या? किती वेळा औषध फवारणी करण्यात आली? किती ठिकाणी धूर फवारणी करण्यात आली? तसेच धूर फवारणीच्या वाहनांची सध्याची स्थिती काय आहे, याचा प्रशासनाने खुलासा करणे गरजेचे आहे.
नागरिकांच्या आरोग्याशी संबंधित विषय असूनही प्रशासनाने केवळ कागदोपत्री कारवाई न करता प्रत्यक्ष मैदानात उतरून डास निर्मूलनाची प्रभावी मोहीम राबवावी, अशी मागणी आता नागरिकांकडून होत आहे.
डेंग्यूचे रुग्ण वाढल्यानंतरच प्रशासन जागे होणार का? आणखी रुग्ण वाढण्याची वाट महापालिका प्रशासन पाहत आहे का? या प्रश्नांची उत्तरे आता फ क्षेत्रीय कार्यालय आणि महापालिका आरोग्य विभागाला द्यावी लागणार आहेत.
घरकुलमध्ये डेंग्यूचा वाढता धोका आणि प्रशासनाची उदासीनता—याकडे महापालिका प्रशासन आता गांभीर्याने पाहणार का?
