पिंपरी, दि. २१ सप्टेंबर २६: पिंपरी-चिंचवड शहरात विनापरवाना कुत्री पाळण्याचे प्रमाण मोठ्या प्रमाणात वाढले असून, अशा कुत्र्यांची योग्य निगा आणि वेळेवर लसीकरण होत नसल्याने नागरिकांच्या सुरक्षेचा प्रश्न निर्माण झाला आहे. त्यामुळे विनापरवाना कुत्री पाळणाऱ्यांवर तसेच परवाना असूनही निष्काळजीपणा करणाऱ्या मालकांवर फौजदारी गुन्हे दाखल करावेत, अशी मागणी संकल्प युवा फाउंडेशनचे संस्थापक अध्यक्ष तथा सामाजिक कार्यकर्ते गणेश जगताप यांनी महापालिका आयुक्त डॉ. विजय सूर्यवंशी यांच्याकडे निवेदनाद्वारे केली आहे.
जगताप यांच्या म्हणण्यानुसार, शहरात केवळ सुमारे ४०० नागरिकांनी महापालिकेचा रितसर परवाना घेऊन कुत्री पाळली आहेत. मात्र, सुमारे ७० ते ७५ हजार नागरिकांकडे विनापरवाना कुत्री असल्याचा त्यांचा दावा आहे. अशा कुत्र्यांचे लसीकरण आणि देखभाल योग्य पद्धतीने होत नसल्यास नागरिकांना धोका निर्माण होऊ शकतो. कुत्र्यांच्या चाव्यामुळे रेबीजसारखे आजार होण्याची शक्यता असल्याने या प्रकाराकडे गांभीर्याने पाहण्याची गरज असल्याचे त्यांनी म्हटले आहे.
झोपडपट्टी, चाळी, घरकुल तसेच झोपडपट्टी पुनर्वसन प्रकल्पातील इमारतींमध्ये जागेची कमतरता असतानाही काही नागरिक कुत्री पाळतात. त्यांना घराबाहेर मोकळे सोडले जाते. परिणामी रस्त्यांवर कुत्र्यांच्या झुंडी तयार होऊन ज्येष्ठ नागरिक, लहान मुले, सायकलस्वार आणि दुचाकीस्वारांच्या सुरक्षेचा प्रश्न निर्माण होत असल्याचा दावा निवेदनात करण्यात आला आहे.
शहरातील वॉशिंग सेंटर, दुकाने, टपऱ्या, गॅरेज आणि हॉटेल परिसरातही विनापरवाना कुत्री पाळली जात असल्याचे जगताप यांनी म्हटले आहे. ही कुत्री रस्त्यावरून जाणाऱ्या नागरिकांच्या अंगावर धावून जातात तसेच दुचाकीस्वारांच्या मागे लागल्याने अपघात होण्याची शक्यता वाढते.
कुत्र्यांच्या हल्ल्यांच्या घटनांनंतर तात्पुरती कारवाई किंवा आंदोलन करण्यापेक्षा महापालिकेने कायमस्वरूपी उपाययोजना करणे आवश्यक आहे. विनापरवाना कुत्री पाळणारे आणि परवाना असूनही निष्काळजीपणा करणारे यांच्यावर कायदेशीर कारवाई करावी, अशी मागणी त्यांनी केली आहे.
महापालिकेने या विषयाची गांभीर्याने दखल न घेतल्यास न्यायालयात दाद मागण्याचा इशाराही गणेश जगताप यांनी निवेदनातून दिला आहे.
